SANN aig fìor dheireadh Celtic Connections a fhuaireadh cothrom èisteachd ri Togaidh Mi mo Sheòlta (Greentrax TRAX311), an CD ùr aig Mairead Stiùbhart, gu slàn, ged a chualar i a' gabhail mòran dhe na h-òrain a th' air nuair a nochd i aig an fhèis.
Tha e a' dearbhadh an liuthad seòrsa òran a bha ri fhaighinn ann am beul-aithris. Am measg nan 17 a tha ri'n cluinntinn tha an Duan Oiseanach Laoidh a' Choin Duibh, nach cluinnear ro thric. Tha òrain bheaga ghoirid ann cuideachd, mar eisimpleir an t-
òran pìobaireachd Cò leis an crodh druimfhionn ud thall? 's am port beag aotrom Chaidh an Dileag ud nam Cheann. Agus tha òrain ann le cuid dhe na seann bhàird a b' ainmeile on 17mh 's on 18mh linn, Fèill nan Crann leis a' Chlàrsair Dhall agus Blàr na h-Eaglaise Brice le Donnchadh Bàn 'nam measg.
Tha iomadh seòrsa faireachdainn air a chur an cèill anns an taghadh òran, rud a tha toirt neart dhan CD seo, a bu chòir a bhith aig a h-uile neach aig a bheil ùidh ann an òrain Ghàidhlig.
Sann aig deireadh na fèise cuideachd a nochd an CD ùr Màiri Anna NicUalraig agus na Seòid o Watercolour Music, agus chualar iad ann an cuirm-chiùil a bha gu math inntinneach.
Tha seachdnar ann dhe na Seòid, fir òga a tha glè eadar-dhealaichte 'nan guthan 's 'nan dòigh seinn. Bha buaidh aige seo corra uair air an t-seinn aca mar sgioba anns a' chiad earainn dhen chonsart, ach an dèidh sin, cha robh teagamh ann nach cualar sàr sheinn fhear, a thug beò spiorad an taigh-chèilidh. Sheinn iad le tuigse 's le smachd, gu togarrach anns na puirt, agus le spionnadh am pailteas ann an Òran Mhanitòba agus Chunnaic mise mo leannan, agus chòrd iad gu mòr ris na bha an làthair. Còrdaidh iad cuideachd ri neach a chluinneas iad air an CD.
B' àbhaist do dh'Iain Hardie a bhith sa chòmhlan Jock Tamson's Bairns. Fhuair e cothrom rannsachadh a dhèanamh air fìdhleireachd Appalachia, agus sann ás a-sin a thàinig an dòigh cluichd a tha e a' cleachdadh air an CD Westringing (IJHCD001).
Tha an fhidheall air a gleusadh ann an dòigh a tha eadar-dhealaichte on àbhaist an-seo, 's chan eil Mgr Hardie a' cleachdadh ceòl-taic ach na tha e fhèin a' cruthachadh air teudan ìsle na fìdhl' aige fhèin. Se CD fìor inntinneach a tha seo, a tha loma-làn de dheagh chluichd. Is math as fhiach èisteachd ris an dòigh sa bheil e cluichd an t-seat le The Rejected Suitor / Malcolm the Tailor / Captain Lachlan MacPhail of Tiree agus The Arthritic Reel.
Còrdaidh Westringing gu mòr ri daoine aig a bheil ùidh ann am fìdhleireachd 's anns na ceanglaichean eadar ceòl Alba 's Appalachia. Ach ann an linn far a bheil a' mhòrchuid cho eòlach air a bhith daonnan a' cluinntinn ceòl-taic, dh'fhaodadh e bhith doirbh èisteachd ri faisg air uair an uaireadair de dh'fhìdhleireachd a tha ás aonais, math 's gu bheil a' chluichd.
Se Four on the floor a th' air an CD ùr aig a' chòmhlan Old Blind Dogs (Vert CD083). Is iadsan Aaron Jones, Rory Campbell, Jonny Hardie agus Fraser Stone. An-seo, gheibhear deagh mheasgachadh de dh'òrain agus ceòl ionnstramaid. Am measg nan sia òran a chluinnear, tha an t-òran aig Ewan MacColla Terror Time, anns an cluinnear deagh eisimpleir dhen alt a th' aig na balaich air seinn ann an co-sheirm. Cluinnear aon òran anns a' Ghàidhlig – Beinn a' Cheathaich, a th' air a sheinn le Rory Caimbeul, fear-ciùil tàlantach aig a bheil ceangal làidir ri Barraigh.
Is gann gu bheil còmhlan ceòl dualchais an-dràsta nach bi a' cluichd puirt ás a' Bhreatainn Bhig, 's mar sin cha robh e 'na iongnadh gun do nochd sreath dhiubh an-seo sa bheil fidheall agus fìdeagan a' dèanamh còmhradh gu fileanta car mu seach. Tha an clàradh air an CD seo daonnan a' leigeil leinn gach guth agus ionnstramaid a chluinntinn gu soilleir, agus is math as fhiach e èisteachd riutha gu dlùth.
Se ceòl glè eadar-dhealaichte a th' aig Phamie Gow air an CD ùr aice Moments of Time far an cluinnear i cluichd air a' phiana sreath de phìosan ciùil a rinn i fhèin. Fhuair i oideachadh o Raghnall Stevenson 's aig an RSAMD, 's tha i cuideachd air cliù a chosnadh mar cluichdeadair clàrsaich. Tha a' chluichd aice air an CD ùr seo air leth brèagha, le cluichd a tha fìor ghrinn 's làn faireachdainn, 's a tha dèanamh sàr fheum de na h-ìrean eadar-dhealaichte de dh'fhuaimean a gheibhear aig an dà cheann dhen phiana mhòr Steinway a tha i cluichd. Cluinnear deagh eisimpleir dhen alt a th' aig Phamie air fuinn bhrèagha a chruthachadh ann an Un Jour de Caroline agus ann an Annandale. Se ceòl làidir a th' air a chruthachadh le sàr mhac-meanmna a th' air an CD, agus b' fhiach a cheannach fiù gus èisteachd ri Remembrance a sgrìobh Phamie mar chuimhneachan air na chailleadh ann an cogadh, agus a tha dèante ann an cruth pìos de cheòl mòr. Tha e drùidhteach da-rìribh.
Bidh "Ceilidh Culture" an Dùn Èideann eadar 22 Màrt 's 13 Giblean –
www.ceilidhculture.co.uk. Am measg nan seinneadairean Gàidhlig a bhios ann bidh Alasdair Codona, Alyth NicCarmaig, Julie Fowlis, Mairead Callan, agus Còisir Ghàidhlig Lothian.
The full article contains 1023 words and appears in The Scotsman newspaper.
