THA sluaghan aithnichte a rèir a' bhathair aca. Ged a tha Barack Obama againn a-nis tha fhathast cus droch bhathar telebhisean a' toirt cliù do dh'Ameireaganaich mar shluagh fèineil air a bheil rudeigin a dhìth a thaobh co-fhaireachdainn agus tuigse.
Gu fortanach tha an t-eadar-lìon 'na fhianais gu bheil Ameireaga eile ann. Feuch na h-òraidean bhideo aig www.Ted.com mar eisimpleir. Tha na h-òraidichean uile 'nam fìor eòlaichean, a' chuid as motha dhiubh aig bàrr an dreuchd. Tha iad uile furasta a
n leantail agus làn fiosrachaidh a tha da-rìreabh "inntinneach".
Tha ceòl agus bàrdachd ann cho math ri farsaingeachd de chuspairean bho na saidheansan, na meadhanan agus na h-ealain.
Le goireasan cho math sin ri fhaighinn an-asgaidh air an eadar-lìon tha ceist chudromach crochaichte os cionn telebhisean agus pàipearan naidheachd. Gu h-àraidh paipearan naidheachd.
Tha deagh mheasadh air an deasbad seo aig an neach dealbhachaidh Jacek Utko. Cuir ainm a-steach do rannsaichear YouTube agus chì thu bhideo dheth.
Se beachd sìmplidh a tha aig Utko. "Chan eil adhbhar prataigeach ann gum mair pàipearan naidheachd. Tha e nas fhasa compiutaran a chleachdadh – agus sàbhalaidh sinn craobhan."
A dh'aindeoin sin, chuir e roimhe a thàlantan a chleachdadh gus beagan beatha a bharrachd a chur air ais ann an grunn phàipearan naidheachd caran tùrsach, leithid Puls Biznesu ("Cuisle Gnìomhachais"). Bha an dealbhadh ùr aige cho soirbheachail 's gun do dh'àrdaich e àireamh luchd leughaidh Puls 30 ás a' cheud thar trì bliadhna. Chaidh Puls aithneachadh mar am pàipear naidheachd as fheàrr dealbhadh san t-saoghal.
Ged a tha www.Ted.com air a bhith ann beagan bhliadhnachan a-nis fhuair mise a-mach mu dheidhinn 's mu dheidhinn Puls Biznesu mun aon àm 's a fhuair mi a-mach gu bheil An Gàidheal Ùr air tighinn gu crìoch.
Se naidheachd glè dhuilich a tha sin oir bha fadachd agam gach mìos gus an leughainn na bha aig sgrìobhadairean leithid Aonghais Phàdraig Chaimbeul neo Joy Dunlop ri ràdh. Esan 'na fhear calma a sheasadh air son na bha e faicinn fìor ged chuireadh iad gu bàs bhàrd e. Ise a chuireadh gàire air aghaidh creige 's a thionndadh smuaintean feallsnachail ás na gheibhear ann am baga-làimhe boireannaich òig.
Tha e doirbh gun coimeas a dhèanamh eadar An Gàidheal Ùr agus Puls Biznesu agus a bhith co-dhùnadh nach eil mòran eatarra a thaobh cho math 's a tha iad a' coimhead. Chan e 's gun robh e riamh mar sin. An toiseach cha do chòrd fiùs an t-ainm ri daoine. Bha blas nan Làbarach Ùra dheth, agus blas a' chreidimh fhasanta gum b'e luchd ionnsachaidh a shàbhaileadh a' Ghàidhlig.
Ach mar thoradh air obair chruaidh thairis air bliadhnachan chaidh An Gàidheal Ùr 'na eisimpleir mhath de rud a rinn Gaidhil air son na Gàidhlig.
Tha e furasta a thuigsinn car son a tha an aon phàipear naidheachd Gàidhlig a tha againn ann an suidheachadh cho lag 's gu bheil e tur eisimeileach air airgead riaghaltais, ach gun mhìneachadh ceart bho Bhòrd na Gàidhlig cha ghabh a thuigsinn car son nach eil An Gàidheal Ùr a' faighinn maoineachadh gu leòr gus a neartachadh 's a leasachadh.
Cha chanadh deasaiche a' phàipeir, Murray MacLeòid, ach gu bheil e sgìth de dhèiligeadh ris a' Bhòrd, nach fhiach an dragh a tha 'na lùib tuilleadh.
Cluinnidh tu an aon sgeul aig mòran – gu bheil iad seachd searbh sgìth a' strì ri buidheann a bha iad an dùil a bh' ann air son an cuideachadh. Tha Art MacCarmaig 'na chathraiche làn thìde aig a' Bhòrd a-nis agus tha gach dòchas ann gun tèid aigesan, a tha cho fìor mhath air conaltradh, air mìneachadh gu mionaideach car son a tha BnaG ann agus gu dè tha iad an dùil a dhèanamh air son na Gàidhlig.
Bidh aige ri innse dè tha iad an dùil fhaighinn ás an làrach lìn ùr aca, www.mygaelic.net, aig cosgais £200,000, neo ás an £74,800 a thug iad, mas fhìor, do Sheirbheis Nàiseanta na Slàinte air a' Ghaidhealtachd air son soidhnichean agus bileagan fiosrachaidh eadar-theangachadh gu Gàidhlig fhad 's a tha banaltruim a' faighinn rabhadh gun a bhith bruidhinn ach Beurla ri chèile agus ri euslaintich.
Tha na meadhanan do-sheachanta do dh'iomairt chànanach sam bith. Ma tha ro-innleachd sam bith aig Bòrd na Gàidhlig a thaobh nam meadhanan agus gu h-àraidh na meadhanan ùra, tha làn thìde aca sin a shealltainn dhuinn.
Mur eil iad comasach air goireas cho bunaiteach ri pàipear naidheachd beag mìosail a chumail a' dol gus litearachd a bhrosnachadh agus aithne Ghaidhealach a chur an cèill, bu cho math dhaibh dorsan na h-oifis mhòir aca an Inbhir Nis a dhùnadh agus na solais a chur dheth. Saoil am mothaicheadh duine nach robh iad ann tuilleadh?
The full article contains 910 words and appears in The Scotsman newspaper.
